Nuwe Toerustingsmateriaal beskikbaar

Ek het pas ‘n splinternuwe skakel na ‘n splinternuwe bladsy op my webblad onder Nuusbriefie bygevoeg.

Vir maande belowe ek nou al dat ek die Lukas 10-program van ‘n Nuwe Ervaring van Bybelse kerkwees beskikbaar gaan stel sodat enige iemand wat belangstel dit kan aflaai van my webblad af.

Wel, dit is gedoen.

En dan het ek sommer ook van die toerustingsmateriaal wat ek spesiaal vir kinders van 4 tot 14 geskryf het ook op daardie selfde bladsy beskikbaar gestel saam met ander materiaal.

Hier is die webskakel daarheen: http://www.nuwewyn.co.za/html/toerusting.html

Die DaniëlPlan

Rick Warren, van die bekende Saddleback Gemeente, vertel vir ‘n joernalis van die TIME-tydskrif hoe hulle gemeente se DanielPlan-eet- en leweprogram totstand gekom het. Hy vertel hoe hy een Sondagoggend, terwyl hy besig was om 800 nuwe bekeerlinge te doop, hier rondom nr 500 ‘n nie-te-geestelike gedagte gekry het, nl. “Ons is darem ‘n klomp baie vet mense in hierdie gemeente!  En kyk hoe lyk ek self! Totaal oorgewig!”

Die Here het toe met hom begin praat hieroor. Die Here het hom herinner dat Hy Sy Gees gestuur het om in Sy mense se liggame te kom woon. Daarom verwag Hy ten minste van ons om goeie rentmeesters en bestuurders te wees van ons liggame solank ons op planeet aarde lewe. En dat Sy hart vir ons ‘n hoë kwaliteitlewe sal wees. Ons sê nie verniet dat ‘n gesonde liggaam, ‘n gesonde siel en gees huisves nie.

Dit was die begin van die DaniëlPlan in hulle gemeente, wat ‘n omvattende 52 weke-gesondheids- en lewensplan is wat gelowiges in die gemeente kan volg om goeie rentmeesters van hulle fisiese gesondheid te word.

Rick vertel hoe hyself, as gevolg hiervan, reeds meer as 20 kg verloor het, en hoe 12 000 gelowiges in hulle gemeente reeds op hierdie stadium meer as 100 000 kg gewig verloor het!

Gaan kyk gerus op hulle webblad hieroor en gebruik die merkwaardige klomp uitstekende inligting hieroor as die Here met jou hieroor gesels. Hier is die skakel daarheen: http://www.danielplan.com/