Wat doen ek vir ‘n lewe?

Die oomblik wat jy vir iemand sê jy is ’n predikant of voltyds in diens van God, word hulle ongemaklik asof jy op daardie oomblik jou masker afgehaal het en hulle ontdek het jy is eintlik ’n wese uit die buitenste ruimte of ten minste ’n heilige monnik uit ’n klooster vêr weg van die normale lewe waarin hulle lewe.

Daarom het ek so ’n bietjie kreatief geword en antwoord ek deesdae die vraag: Wat doen jy vir ’n lewe?, heeltemal op ’n ander manier.

Ek sê vir hulle: Haai, weet jy, ek werk vir ’n wêreldwye groep met plaaslike takke wat feitelik in elke dorp of stad in die wêreld kantore en besighede het.

Ons hart is om om te sien na elke behoefte en nood van die mens. Daarom sorg ons vir bejaardes, weeskinders, VIGS-pasiënte, siekes en alle soorte verslaafdes. Ons het selfs skole, universiteite, hospitale, radio- en TV-stasies.

’n Mens kan sê: Ons oogmerk is om elke mens op aarde se lewe op die een of ander manier te verryk, te verander en te verbeter, sodat hy of sy die wonder van lewe opnuut ontdek en voluit kan belewe.

As iemand dan sou vra: Maar vir watter groep werk jy?, antwoord ek hulle: Ek is voltyds in diens van die Ekklesia of Kerk van Koning Jesus.

Advertisements